५.१.६ शैक्षिक गुणस्तर सम्बन्धी विवरण

शैक्षिक गुणस्तर भनेको के हो? शिक्षाको गुणस्तरलाई तीन कोणबाट हेरिन्छ — इनपुट (शिक्षक, भौतिक पूर्वाधार, पाठ्यसामग्री), प्रक्रिया (कक्षाकोठाको सिकाइ–शिक्षण, मूल्याङ्कन, विद्यालय व्यवस्थापन) र नतिजा (सिकाइ उपलब्धि, उत्तीर्ण दर, जीवन–सीप) । केवल भर्ना संख्या बढाएर गुणस्तर सुनिश्चित हुँदैन; भर्नाको चुहिने पाइपलाइन र विद्यार्थी–शिक्षक अनुपातले देखाएझैँ, पहुँच र गुणस्तर फरक कुरा हुन् । तुलसीपुर उप–महानगरपालिकाले गुणस्तर सुधारका लागि अपनाएका मुख्य संयन्त्र निम्न छन् ।